जुभुङ्ग गा.वि.स. पश्चिमान्चल विकास क्षेत्र अन्तर्गत लुम्बिनी अंचलको गुल्मी जिल्लाका ७९ गा.वि.स.हरुमध्ये जिल्लाको सदरमुकाम तम्घासबाट पुर्व ३ कोश दुरीमा अवस्थित छ |पूर्वमा रुपाकोट ,हूँगा ,पश्चिममा रेसुंगा ,उत्तरमा बलिथुम,तुराङ्ग र दक्षीणमा गौडाकोट,बिरबास,पल्लीकोट गा.वि.स.हरु सिमानाको रुपमा रहेका छन् |यस गा.वि.स.को सबै वडाहरुमा मोटरबाटो पुगेको छ |साथै बिजुली र मोबाइल फोनको सेवा पनी उपलब्ध छ |हरियाली बन जंगल डल्ली र सिस्ने खोलाहरुसंगै महाभारत पर्वत शृंखलामा प्राकृतिक,भौगोलिक र सास्कृतिक मनोरमताले सिंगारिएको गुल्मी जिल्लाको नजिकको गा.वि.स.हरुमध्ये एक हो |यँहा विभिन्न रैथाने जातजातिका जम्मा ९३४ घरमा महिला २७४८ र पूरुष २८८० गरि जम्मा कुल जनसंख्या ५६२८ (जुभुङ्ग गा.वि.स.को पार्श्वचित्र २०६८ अनुसार)रहेको छ |
 |
निर्वाचन क्षेत्र न.२ र इलाका क्षेत्र न.८ मा पर्ने यस जुभुङ्ग गा.वि.स.को प्रमुख बस्तीहरू देउरालीपोखरा,कोलगैरा,चिलाउनेपोखरी,छहरा,साईसे,काब्रेपोखरी,तल्लागाउँ,डल्लीखोला,हटिया,कोटटोला,टङ्गलाजी,घुर्मी,उर्लाकोट,ठुलाचौर,फोक्सिबास,हुल्टुङ,घोराहा आदि हुन् |कहिँ समथर कहिँ भिरालो भू-भाग भएपनि उर्वरा मलिलो माटोको कारण प्रशस्त अन्न उत्पादन हुन्छ |यँहा मौसम अनुसारको खेति बार्है बहिना गर्न सकिन्छ |यँहाको मुख्य पेशा खेती नै हो |मुख्य बाली धान,गँहु,मकै,कोदो,दालहरुमा बोडी,सिमी,केराउ,मास,मसुरो,तरकारी,विभिन्न फलफुल, तरकारी खेती,सुन्तला खेती,अदुवा खेती र केरा खेती आदि हुन् |आजभोलि व्यावसायीक रुपमा तरकारी खेती,कुखुरापालन आदि गरिदै आएको छ |उत्पादित खाधान्न तथा तरकारी स्थानीय बजार वा तम्घास,पाल्पा,बुटवल आदिमा बेचबिखन गरिन्छ |
यहाँका अधिकांश मानिसहरुले हिन्दु धर्म मान्ने गर्दछन |ब्राह्मण,क्षेत्री,मगर,नेवार,कामी,दमाई,सार्की आदि यस गा.वि.स.का मुख्य जातजाति हुन् | यहाँका मुख्य चाडपर्व दशैं,तिहार,तिज,माघे संक्रान्ति,साउने संक्रान्ति,जनै पुर्णिमा आदि हुन् |यस गा.वि.स.मा सीतोष्ण (मधुर किसिमको) हावापानी पाइएता पनी बार्है महिना एकै नासको हावापानी छैन |चैत्र महिना देखि असोजको शुरु सम्म गर्मी हुन्छ |असोज,कार्तिक र फागुनमा समसीतोष्ण हुन्छ भने मंसिर,पौष र माघमा निकै जाडो हुन्छ | जेष्ठको अन्त्य देखि असोजको सुरुसम्म मनसुनी वायूका कारण प्रशस्त वर्षा हुने गर्दछ |
जुभुङ्ग गा.वि.स.को ऐतिहासिक पृष्ठभूमि (नामाकरण)
जुभुङ्ग गा.वि.स.को नाम कसरी रहन गयो भन्ने बारेमा यो शब्द मगर भाषाबाट आएको हो | जु भनेको कटुस र भुङ्ग भनेको बास भनेर बुझिन्छ | यसै शब्दावलीबाट गा.वि.स.को नाम जुभुङ्ग राखिएको हो भन्ने भनाइ रहेको छ | यसै ठाउमा तात्कालिन पंचायतको कार्यालय रहेकोले जुभुङ्ग गाउँ पंचायत हुन् गयो |२०४८ सालपछि जुभुङ्ग गाउँ पंचायतको ठाउँमा जुभुङ्ग गा.वि.स.राखिएको हो |
